Мостай Кәрим исемендәге Милли йәштәр театры йәнә “Беҙҙең өйҙөң йәме” спектакленең премьераһына әҙерләнә
2005 йылда Мостай Кәрим исемендәге Милли йәштәр театрында «Беҙҙең өйҙөң йәме» спектакле (режиссеры – Мөсәлим Күлбаев) сәхнәгә сығыуы республиканың мәҙәни тормошонда ҙур ваҡиға булғайны. Уға Мостай Кәрим үҙе фатиха биргән, премьерала сәхнәгә күтәрелеп, режиссерҙың, актерҙарҙың ҡулдарын ҡыҫҡан. “Беҙҙең өйҙөң йәме” спектакле “Өс таған” һәм “Беҙҙең өйҙөң йәме” әҫәрҙәренә нигеҙләнеп эшләнгән (инсценировка авторы – Мөсәлим Күлбаев). Йәмил исемле башҡорт малайы (Башҡортостандың атҡаҙанған артисы Рәмзил Сәлмәнов) менән украин ҡыҙы Оксананың (Башҡортостандың халыҡ артистары Александра Комарова, Гөлшат Ғайсина) йылы мөнәсәбәте аша дуҫлыҡ тәрбиәләгән әҫәр театр репертуарында үҙенә генә тәғәйен урынын биләп, тамашасының яратҡан спектакленә әүерелгәйне.
“17 йыл элек зал тулы тамашасы йыйған әҫәр быйыл, Еңеү байрамы алдынан, 5 һәм 6 майҙа үҙ тамашасыһын яңы состав, яңы сәхнә биҙәлеше менән ҡыуандырмаҡсы. Төп геройҙарҙы театрҙың йәш актерҙары алыштырыр, элеккеләре иһә унан алдағыларының урынын алыр, сәхнә биҙәлеше лә яңыра төшөр, әммә спектаклдең мәғәнәһе, йөкмәткеһе Мостай фатихаһын алғандағыса ҡалыр”, – тип хәбәр итте театрҙың әҙәбиәт бүлеге етәксеһе Рәзилә Ырыҫҡужина.
Театр һөйөүсе дуҫтар, премьеранан ситтә ҡалмағыҙ!
Фото – театр архивынан.
